ब्रेकिंग

गुन्हेगारी जगत

कोयत्याने वार करुन तरूणाच्या खुनाचा प्रयत्न

Wrutuja pandharpure
14 Jun 2025

पुणे : पूर्वी झालेल्या भांडणाचा राग मनात धरून धनकवडी परिसरात टोळक्याने दहशत माजवून तरुणावर कोयत्याने वार करुन खूनाचा प्रयत्न केला. याप्रकरणी सहकारनगर पोलिसांनी तिघांवर गुन्हा दाखल केला.बाबा मालुसरे (वय १९), संकेत कसबे (वय १८), सोहम सोनार (वय २०, सर्व रा. धनकवडी) अशी गुन्हा दाखल केलेल्यांची नावे आहेत. याप्रकरणी, नितेश विनोद गायकवाड (वय १८, गोविंद पाटीलनगर, धनकवडी) याने सहकारनगर पोलीस ठाण्यात तक्रार दिली.

गायकवाड हा मंगळवारी रात्री आठच्या सुमारास घरासमोर थांबला होता. त्यावेळी, आरोपी मालुसरे, कसबे आणि सोनार हे दुचाकीवरुन तेथे आले. त्यांनी जुन्या भांडणाच्या कारणावरुन मोठमोठ्याने शिवीगाळ करुन लाथाबुक्क्यांनी मारहाण करण्यास सुरूवात केली. त्यानंतर, सोहम सोनार याने त्याच्याकडील कोयता काढून नितेश याच्यावर वार केला. गायकवाड याने हातावर वार झेलण्याचा प्रयत्न केला. तेव्हा, आरोपींनी केलेल्या हल्ल्यात तो जखमी झाला. नितेश गायकवाड याच्या घरासमोर त्यांनी मोठमोठ्याने शिवीगाळ करत त्यांच्याकडील कोयते हवेत फिरवून आम्ही धनकवडीचे भाई आहोत, आमच्या नादाला लागायचे नाही, असे मोठमोठ्याने म्हणत दहशत माजविली. पोलीस हवालदार धोत्रे याप्रकरणी अधिक तपास करत आहेत.